ഗണനാഥ! നമിപ്പു

ഗുണമെന്നുടെ ചിന്തകൾക്കു വ-
ന്നണയാനായ് ശരണം  പദാംബുജം
തുണയാകുക ജീവനെപ്പൊഴും
ഗണനാഥൻ സതതം നമിപ്പു ഞാൻ

ശരണം

ഹര! ശങ്കര! വാഴ്ക മാനസേ
ഹര ദുഃഖം ഭയമൊക്കെ മാറ്റണേ
പുരവൈരി തുണയ്ക്ക സന്തതം
ശരണം നിൻ ചരണാംബുജം സദാ

നാഗമേ!

ഹരനാഭരണം ഫണീന്ദ്രനാ-
മുരഭിത്തിന്നഥ മെത്തയായ് തഥാ
ധര താങ്ങിയമർന്ന നാഗമേ!
വരണേ വരമേകിടേണമേ

മരുദാലയേശ!

അരുളാ, യിരുളൊക്കെ മാറ്റിടും
പൊരുളായ്, ഭീതിയകറ്റിടുന്നതാം
ഗുരുവായ് മരുദാലയേശ! നീ
കരുണാർദ്രം ഹൃദി വാഴ്ക സന്തതം

കാളരാത്രി!

കളയായ് വളരുന്ന നീചരെ –
ക്കളയാനായിഹ കാളരാത്രി നീ
ഖലനിഗ്രഹശക്തിയായി നിഷ്-
ക്കള! ചിത്തേ ബലമേകിവാഴണേ

വരവാണീ!

തരണം കൃപ, നാന്മുഖപ്രിയേ!
വരണം, ഭക്തി കനിഞ്ഞുനൽകണേ
വരമായ് പദമേക നിത്യവും
വരവാണീ ഹൃദി വാഴ്‌ക സന്തതം

ശരണം

ഗുരുവായുപുരത്തിലെന്നുമേ
മരുവീടും ഭഗവൻ തുണയ്ക്കണേ
അരുളായറിവായ് ഗുരുത്വമായ്
കരുണാർദ്രം ശരണം തരേണമേ

ഗണനായക!

ഗണനായക! ഭക്തവത്സലാ!
തുണയെന്നും തവ പാദപങ്കജം
അണയും മമ ചിന്തകൾക്കു നീ
ഗുണമേകാൻ ഹൃദി വാഴ്ക നിത്യവും

മുരുക!

മുരുകാ! ഗുഹ! വേലവാ! സദാ
കരുണാർദ്രം തുണയായിരിക്ക നീ
ഇരുളും പൊഴുതേക വെട്ടമെൻ
ഗുരുവായിട്ടഭയം തരേണമേ

തിരുമാന്ധാംകുന്നിലമ്മേ!

ഉരുകുന്ന മനസ്സുമായൊരാൾ
തീരുമാന്ധാംമല തന്നിലെത്തിയാൽ
കരുണാർദ്രമണഞ്ഞു നല്ലതാ –
മൊരുമാർഗ്ഗം തരുമംബ! മേ തുണ