ശ്രദ്ധിക്കുക

രോഗമുണ്ടാക്കും കോവിദനിപ്പോൾ
ലോകത്തെങ്ങും നടക്കുന്നു
പോകേണ്ടാ പുറത്തെങ്ങുമാമയം
വേഗമിപ്പോൾ പടരുന്നൂ

ഒട്ടേറെ വേഗമോടുന്നെന്തിനാ –
യിട്ടുതെല്ലിട നിന്നീടാം
പെട്ടെന്നെന്തിനിങ്ങോടിത്തീർപ്പതി-
മ്മട്ടായ് തന്നുടെ ജീവിതം

സൂക്ഷിക്ക നല്ലൂ, കൈകൾ വൃത്തിയായ്
വെയ്ക്കാം ശ്രദ്ധയോടിക്കാലം
തൽക്കാലം വിട്ടിൽ തങ്ങാം, സങ്കടം
പോക്കാൻ വായിക്കാം പുസ്തകം

പുത്തൻ വിദ്യ പഠിക്കാനിക്കാല –
മോർത്താൽ നല്ലോരു സന്ദർഭം
വൃത്തിയാക്കിടാം വീടു നന്നായി –
ട്ടിത്തരുണത്തിലെന്നോർക്കാം

വീട്ടിലുള്ളതാം ജോലികൾ ചെയ്യാം
കുട്ടികളൊത്തു മേളിക്കാം
കൂട്ടുകാരോടു ഫോണിൽ സംസാര –
മിഷ്ടം പോലിപ്പോൾ ചെയ്തീടാം

അന്യർക്കായുപകാരം ചെയ്യുവാ-
നിന്നു തെല്ലു ശ്രമിച്ചീടാം
ബന്ധുക്കളോടു വർത്തമാനവു-
മിന്നാവാം നല്ലപോൽ തന്നെ

ഒട്ടേറെ തിരക്കുള്ള കാലത്തു
വിട്ടുപോയതാം ബന്ധങ്ങൾ
ഒട്ടൊക്കെയിപ്പോൾ നന്നാക്കാം, നന്നീ –
മട്ടായുള്ളോരുകാലവും

നല്ലനാളേയ്ക്കു വേണ്ട കാര്യങ്ങ-
ളെല്ലാമോർത്തോർത്തു ചെയ്തീടാം
തെല്ലു സങ്കടമുൾത്താരിൽ വേണ്ടി –
ന്നെല്ലാം നല്ലതിനെന്നോർക്കാം

ധ്യാനം

കരുണ ചൊരിയു വിഘ്നേശാ നീ മനസ്സിലണഞ്ഞിടൂ
ശരണമിവനു നല്കൂ നിത്യം ദുഃഖം വരുന്നതു മാറ്റണേ
ചരണയുഗളമല്ലാതില്ലെങ്ങുമാശ്രയമെന്നു ഞാ-
നറിവു മനസി നിന്നെതന്നെത്തിരഞ്ഞമരുന്നിതാ

ധ്യാനം

ദുരിതമിവനെ നീറ്റും നേരം തുണയ്ക്കുവതിന്നഹോ
ഹരിഹരസുത നീയെന്ന്യേ കാണുമാരു ജഗത്തിലായ്
ചരണകമല യുഗ്മേ നല്കീടുകാശ്രയമെപ്പൊഴും
കരുണ ചൊരിയു ജീവന്നേകൂ കൃപാബലമയ്യനേ

ധ്യാനം

ചരണകമലമെന്നും ചിത്തേ തെളിഞ്ഞു വരാന്‍ ഹരേ
വരമരുളുക ജീവന്നായ്, നീ കനിഞ്ഞു തരൂ മനം
തിരയുമറിവു, വാഴ്വായ് കാണുന്നതും, കൃപയായഹം
അറിവിനു തുണച്ചീടേണം നീ സദാ ഗുരുവായ് വിഭോ

ധ്യാനം

ലക്ഷണം: “നനമരഹരി യാറും പത്തും നിറുത്തി സലം ഗുരു”
000/000/(യതി)—/-(യതി)0-/0-0/-

കരുതുക മന മെന്നും കാടാ യുമെന്നംബികേ
കരുണയൊഴുകി യാറായ് കാണായ് വരേണമെനിക്കു നിന്‍
ചരണകമല യുഗ്മേ മേവീ ടുവാന്‍ തരണം ശിവേ
വരമതുമതി ജന്മം ധന്യം ശിവേ കൃപയേകിയാല്‍