മറച്ചെന്റെകണ്ണെന്നുമെന്നിട്ടതില്‍ നീ
മറഞ്ഞൂ ഹരേ ഞാനറിഞ്ഞില്ല സത്യം
നിറഞ്ഞോരു ശോകം നിറച്ചെന്റെ കണ്ണില്‍
കുറേ കണ്ണുനീര്‍ ഞാന്‍ മറന്നല്ലോ നിന്നേ
കുറച്ചൊക്കെയെന്തോ ജപിച്ചെങ്കിലും ഞാന്‍
മറന്നൂ പലപ്പോഴുമെന്നെത്തുണയ്‌ക്കാന്‍
മറയ്‌ക്കുള്ളിലായ് നിന്നൊരാശ്വാസമേകാന്‍
പറഞ്ഞൊന്നുമേ ഞാനറിഞ്ഞില്ല കഷ്ടം
അറിഞ്ഞിന്നു നീയെന്റെ മുന്നില്‍ തെളിഞ്ഞൂ
പറഞ്ഞീടുവാന്‍ സത്യമേവം കൃപാലോ
അറിഞ്ഞെന്തു ഞാന്‍ നിന്റെ ലീലാവിലാസം
കുറച്ചൊക്കെ കുത്തിക്കുറിക്കുന്നിതേപോല്‍
പറഞ്ഞീടണം നന്ദിയെന്നാലതൊന്നും
കുറേ വാക്കു ചൊല്ലീടിലും തീരുകില്ലാ
കുറിക്കുന്നതെല്ലാം വിഭോ നിന്‍ പദബ്ജേ
വരും പുഷ്പമായെങ്കിലോ ഞാന്‍ കൃതാര്‍ത്ഥന്‍
പ്രചോദനം: ശ്രീമദ് ഭാഗവത സംഗ്രഹം (ഉണ്ണികൃഷണൻ വാരിയർ)
Whispering along! 