സുഖദം

തിരുമുടിതെളിവതുമഴക, തു നിശ ത-
ന്നിരുളിതികരുതിയൊരിവനറിയുവതോ
തിരുവടിയുടെയുരുകൃപ, ശശികല   ത-
ന്നരുളിടുമൊളിസമമതു ഭുവി സുഖദം

നമനം

കവിവര! തവ മൊഴിയറിയുവതഖിലം
കവിതകളതുവിധമൊരുദിനമെഴുതാൻ
ഇവനൊരുവഴിയുടനരുളുക സദയം
തവ പദയുഗമതിലിതു മമ നമനം

സദയം

നദി, ശശികലയിവ തിരുജടയതിലാ-
യതിസുഖമമരുവതിവനകതളിരിൽ
പ്രതിദിനമൊരുഞൊടിതെളിയണമതിനായ്
സതിയുടെപതി തുണയരുളുക സദയം

ധ്യാനം

ശിവ! മമ മനമനുദിനമിഹ തിരയും
തവ പദമരുളണമൊരുതുണയനിശം
നവ പദഗണമിവനരുളുക പതിവായ്
ഭവപദനുതി പലതിതുവിധമെഴുതാൻ

ലക്ഷണം: നഗണയുഗളയുഗമൊടു സ ശശികലാ