CODA day

കേഴ്വിശക്തിയിയലാതെ, കുട്ടികൾ
കേണിടുന്നതറിയാതിരിക്കിലും
കൂടെനിന്ന ജനനിക്കു താതനും
കാണ്മതായ കരുണയ്ക്കു കൂപ്പുകൈ
#coda
#codaday

പൂരപ്പറമ്പ്

തേക്കിന്റെ കാടന്നു  വെട്ടാനൊരുങ്ങവേ
തുള്ളിവന്നെത്തുന്ന കോമരത്തിൻ തല
തമ്പുരാൻ വെട്ടിയക്കാടും നിരത്തി തൻ
തൃശ്ശിവപ്പേരൂരിൻ പൂരപ്പറമ്പാക്കി

ഗണനാഥൻ തുണ

തുമ്പം വരുമെന്നാലവ മാറ്റീടണമൊറ്റ –
ക്കൊമ്പൻ കൃപയോടെൻ ഹൃദി വാണീടണമെന്നും
തുമ്പിക്കരമൊന്നീതലയിൽ ചേർക്കണമെന്നുൾ –
ക്കമ്പം കളയാനായ്, ഗണനാഥൻ തുണയെന്നും

ദിവ്യനൃത്തം

ചിത്തരംഗത്തിലായ് നിത്യമാടുന്നതാം
നർത്തകൻ നർത്തനം ചെയ്യുന്നവേളയിൽ
നൃത്തം ചവിട്ടുന്നു മാനസപ്പൂവതിൽ
തത്തുന്നതേൻതുള്ളി വാക്കായി മാറുന്നു

പൂരപ്രബന്ധം

സിതമണിമഹനെന്നായ് പേരെഴും വിപ്രവര്യൻ
സഹൃദയജനമെല്ലാമാസ്വദിക്കുന്നമട്ടിൽ
സരസമെഴുതി തൃശ്ശൂർ പൂരവാർത്താവിശേഷം
സരളതരമതിന്നും ഭാഷ തൻ ഭൂഷ തന്നെ

പൂരം

പൂരമെന്നോതിയാൽ ത്രിശ്ശിവപേരൂരിൻ
പേരെഴും പൂരമിക്കാലത്തു കാണുവാൻ
ദൂരെ നിന്നെത്തിടും കാണികൾ വിസ്മയം
പൂരപ്പറമ്പിലെയാഘോഷഘോഷങ്ങൾ

തൃശ്ശൂർ പൂരം

ശക്തൻ തന്നെ തുടങ്ങിയാശിവപുര –
പ്പൂരം പുരാ, കാണുവാ-
നെത്തുന്നൂ ജനകോടിയിന്നുമവിടെ –
യ്ക്കെന്നല്ലി കാണുന്നു നാം
ചിത്രം! മേളവുമാനയും, കുടകൾ തൻ
മാറ്റം, വെടിക്കെട്ടുമായ്
ചിത്തേ തോഷമനന്തമായരുളുമീ –
യാഘോഷഘോഷം സദാ

നൃത്തദിനം

ചിത്തരംഗമതുപോലെലോകവും
നൃത്തവേദി നടരാജനെന്നുമേ
നർത്തനം തുടരുമീശ്വരന്റെ സ-
ങ്കീർത്തനം ശ്രുതികളോതുമെപ്പൊഴും

കുടമാറ്റം

നിരനിരയായിക്കനവുകളുള്ളിൽ
നിരവധി വർണ്ണപ്പൊലിമ തരുംപോൽ
ശിവപുരി തന്നിൽത്തെളിവൊടു നന്നായ്
ശിവശിവ! കണ്ടീടുക കുടമാറ്റം

പ്രാർത്ഥന

ശങ്കരൻ ശങ്കരീവല്ലഭൻ നെഞ്ചിലെ-
പ്പങ്കമെല്ലാം കളഞ്ഞാശ്രയം നൽകുവോൻ
സങ്കടം പോക്കണം കാക്കണം മാനസ –
ത്തിങ്കലെല്ലായ്പൊഴും വാണുകാത്തീടണം