തോൽക്കുകില്ല

തോക്കുകൾക്കു മുന്നിലും ഭയന്നിടാനെ നിന്നവർ
തോൽക്കുകില്ലയെന്നു കാലമോതിടുന്നു കേൾക്ക നാം

പുന്നപ്ര വയലാർ സ്മാരകം

രക്തസാക്ഷിമണ്ഡപം

തിരഞ്ഞെടുപ്പുചൂട്

കടുത്തചൂടിലും പ്രചാരണം തുടർന്നുപോൽ തിര –
ഞ്ഞെടുപ്പകാലമെന്നതോർത്തു സർവ്വസാക്ഷിയാമിനൻ
പടുത്വമറ്റു, താപമേറ്റു ദാഹമേറവേയതൊ-
ട്ടൊടുക്കുവാനിറങ്ങി താഴെയാഴിതന്നിലേയ്ക്കവൻ

വിഷുക്കണി

ഇരുട്ടകറ്റി നല്ലകൊല്ലമീജഗത്തിനേകുവാൻ
വരുന്നനാളുദിച്ചുയർന്നു സൂര്യദേവനെത്തവേ
മരുത്പുരേശ! ദർശനം തരേണമായതിന്നു തെ-
ല്ലൊരുക്കിടുന്നു ഞങ്ങളും വിശിഷ്ടമാം വിഷുക്കണി 

തുമ്പി ഗുരു

കുറച്ചുമാത്രമാത്രമാണു വാഴ്‌വതെങ്കിലും ഭയം
മറന്നു വാടിതന്നിലോടിവന്ന തുമ്പി സന്തതം
പറഞ്ഞിടുന്ന കാര്യമോർക്ക, സങ്കടം വെടിഞ്ഞു നീ
പറക്കണം, പരത്തണം ശുഭേച്ഛ നൽപരാഗമായ്

മോഹം!

തിരഞ്ഞെടുപ്പടുത്തുവന്നതോർത്തു, കാൺക, ചൂടിലും
നിരത്തിലൊക്കെ നേതൃവൃന്ദമെത്തിടുന്നു നിത്യവും
നിരത്തിടുന്നു മോഹമേകിടുന്ന  വാക്കു, കേൾക്കെയി-
ത്തരത്തിലേതുനാളുമാകുവാൻ കൊതിച്ചിടുന്നു ഞാൻ

ഇതും കടന്നുപോയിടും

ഇതും കടന്നുപോയിടും, മറക്കുമൊക്കെ ലോകരും
പതുക്കെയിന്നിണം പുരണ്ടവാർത്ത വീണ്ടുമെത്തിടും
അതെക്കുറിച്ചുചർച്ചയാകുമിത്തരത്തിലെത്ര നാ-
മിതേവരേയ്ക്കുകണ്ടു, മാറ്റമെന്തു വന്നുചേർന്നിടാൻ?

തുണയ്ക്ക

ഗുണങ്ങളെൻ്റെ ചിന്തകൾക്കു വാക്കുകൾക്കുമിങ്ങുവ-
ന്നണഞ്ഞിടാൻ കുറിച്ചതാം പദങ്ങൾ പൂജയായ് വരാൻ
വണങ്ങിടുന്നു ഞാൻ ഗണേശതൃപ്പദത്തിലെന്നുമേ
തുണയ്ക്ക, സങ്കടം കളഞ്ഞു രക്ഷയേക സന്തതം

സഭാകമ്പത്താൽ

ഒരുങ്ങിവേണ്ടപോലെ നല്ലവേഷമിട്ടു മെല്ലെയൊ –
ന്നരങ്ങിലെത്തിയാടുവാൻ ശ്രമിച്ചിടുന്നവേളയിൽ
പരുങ്ങിനിന്നുപോയ്, സഭാഭയം വളർന്നു, തൊണ്ടയിൽ
ക്കുരുങ്ങി വാക്കു , ഞാൻ പതുങ്ങി പാവമാം കുരങ്ങുപോൽ

തിരഞ്ഞുപോവതെന്തു?

തിരഞ്ഞുപോവതെന്തു വന്നണഞ്ഞതെന്തിനായ് ഭവാൻ
തിരിച്ചറിഞ്ഞു കാഴ്ചകണ്ടു യാത്ര ചെയ്ക സന്തതം

മനസ്സ്

അനന്തസാഗരം കണക്കു ചിന്തപൊങ്ങിടുന്നതാം
മനസ്സു, ബോധസൂര്യനും മറഞ്ഞിടുന്നതിന്നകം
അനങ്ങിടാതിരിക്കയില്ല തെല്ലുനേരമാർക്കുമേ
മനസ്സിലാവുകില്ലതിൻ പരപ്പതിൻ്റെയാഴവും