തത്വമസി!

എന്നുള്ളിലായ് ദര്‍പ്പതമസ്സു തിങ്ങി-
നിന്നോരു നേരത്തു ഭവാന്റെ രൂപം
എന്തെന്നതോര്‍ക്കാതെ തിരഞ്ഞു ലോക-
ത്തെന്തോരു വങ്കത്തരമാണതയ്യേ!

എന്നുള്ളിലാണങ്ങു വസിപ്പതെന്നാ-
യെന്നോടൊരാളെങ്കിലുമോതിടേണ്ടേ?
എന്തിന്നു നീ മൂടി മറച്ചു സത്യ=
ത്തിന്‍ സ്വര്‍ണ്ണപാത്രം ഹൃദയത്തിനുള്ളില്‍ ?

എന്തെങ്കിലും തെല്ലു പറഞ്ഞു തന്നാല്‍
തന്നെ പ്രയാസം പറയാതിരുന്നാല്‍
പിന്നീടു ചുറ്റിത്തിരിയുന്നുവെന്നേ
വന്നീടുവെന്മാനസമാം കുരങ്ങന്‍

ഒന്നാണു നാമെന്നതറിഞ്ഞിടാതെ-
ത്തന്നെത്തിരഞ്ഞൂ പല ദിക്കിലും ഞാന്‍
എന്നുള്ളിലേക്കൊന്നു തിരിഞ്ഞു നോക്കാന്‍
നിന്നില്ല കഷ്ടം മിഴി നീ മറച്ചോ