ബ്രഹ്മവിവര്ദ്ധന! കാണ്മതുമായ, മറഞ്ഞമരും
ബ്രഹ്മ, മതിങ്ങിരുളൊക്കെയകറ്റി വളര്ന്നിടുവാന്
നന്മ നിലാവൊളിപോല് പകരും ശശിപോല് തെളിയാ-
നെന്മനമിന്നു നമിപ്പു മഹാബലിയായ് ഭഗവന്
(അശ്വഗതി)
ബ്രഹ്മം = ഏകമായ സത്യം .. പലതായി കാണുന്നതെല്ലാം മായ… അതു ഒരു മറ/ഇരുള് .. വെളിച്ചം വരുമ്പോള് ഇരുള് മറയുന്നു… വെളിച്ചം വളരുന്നില്ല പക്ഷെ എല്ലായിടത്തും നിറയുന്ന, ആ നിലയില് വളരുന്ന പ്രതീതി ജനിപ്പിക്കുന്നു.. യഥാര്ത്ഥത്തില് വളരുന്നില്ല, വളരേണ്ടതില്ല കാരണം അതു മാത്രമേ ഉള്ളൂ.. മനസ്സില് വന്നത് മഹാബലിയുടെ മുന്നില് വാമനമൂര്ത്തി വരുന്ന രംഗം ..ഭക്തമനസ്സിന്റെ ആദ്യനാമശ്രവണം പോലെ.. പിന്നീട് അതു തന്നെയാകുന്നു, അതിന്റെ അധീനത്തിലാകുന്നു മൂന്ന് ലോകങ്ങളും … ഭക്തനെ എല്ലാ വിധത്തിലും രക്ഷിച്ചുകൊണ്ട് ഭഗവാന് ഇരിക്കുന്നു..അത് ഭക്തന് കാണുകയും ചെയ്യുന്നു.. ബലി മഹാബലിയാകുമ്പോള് ശിരസാ നമിക്കാന് മാത്രമേ ആകൂ… എല്ലാം ഈശ്വരേച്ഛ.. മര്ക്കടകിശോരന്യായത്തില് നിന്നും മാര്ജ്ജാരകിശോരന്യായത്തിലേയ്ക്കുള്ള മാറ്റം
അമ്മക്കുരങ്ങിന്റെ പുറത്തു നിത്യം
ചെമ്മേയിരിക്കുന്നകുരങ്ങു താന് ഞാന് *
ഇമ്മട്ടിലായീടണമത്രെയേറെ
ജന്മങ്ങളായ് ഭക്തിയുറച്ചിടാനായ്
പിന്നീടു കാണാമൊരുപൂച്ച നിത്യം
തന്നുണ്ണിയെത്തേടി വരുന്ന പോലെ
വന്നെത്തുമത്രേ+ പദഭക്തി ചിത്തേ
നന്നായുറച്ചാലതുജന്മപുണ്യം
* മര്ക്കടകിശോരന്യായം
+ മാര്ജ്ജാരകിശോരന്യായം