ഉദ്ധവവിലാപം

പോകാനൊരുങ്ങുന്നതെന്തിന്നു കേശവാ
പാരിതിൽ വാസം കഴിഞ്ഞുവെന്നോ
പാവമീഞങ്ങൾക്കൊരാശ്രയമാരുതാൻ
പാരം വിഷമം വരുന്നനേരം

കൂടെയെന്നും ഞാൻ നടക്കാൻ കൊതിച്ചതും
കണ്ടറിഞ്ഞല്ലയോ കൂട്ടിനെത്തീ
കാലം പിഴയ്ക്കുന്ന കാലത്തു കണ്ണനും
കൈവിടുമെന്നാൽ തുണപ്പതിനാർ

നിൻ നിഴൽ പോലെ നിന്നൊപ്പം നടക്കണ –
മെന്നാഗ്രഹിച്ചതെൻ കുറ്റമാണോ
നിന്നെ സ്മരിപ്പോർക്കു ചിന്ത മറ്റെന്തു താ-
നെന്നുമുണ്ടാവതും വാസുദേവാ

കണ്ടു ഞാൻ ഗോപീഗണത്തിൻ്റെ സങ്കടം
കണ്ണാ, ഭവാനിങ്ങു വന്നശേഷം
കഷ്ടമമ്മട്ടിലായ് ഞങ്ങളെയൊക്കെയും
കൃഷ്ണൻ വെടിഞ്ഞെങ്ങു പോയിടുന്നൂ

കണ്ണിനു ദർശനം നൽകയില്ലെങ്കിലാ
കണ്ണെന്തിനാണെന്തുകാണ്മതിന്നായ്
കാതിലെത്തില്ല നിൻ നാദമെന്നാകിലോ
കാര്യമെന്തുണ്ടതുരണ്ടുകൊണ്ടും

#ഉദ്ധവവിലാപം