കൃസ്തുമസ്സ്

കൃസ്തുമസ്സ് ദിനമണഞ്ഞു, ഭൂവിലേ –
യ്ക്കെത്തിടുന്നു മിശിഹാ കൃപാർദ്രനായ്
മർത്യനുള്ള വിഷമങ്ങളത്രയും
തീർത്തുരക്ഷയരുളും കൃപാമയൻ

മിശിഹായേ!

കരുണയ്ക്കില്ലിവിടെയിടം, കൈബലമതുപോൽ സ്വത്തധികാര –
പ്പെരുമയ്ക്കും വിലയിതുകാലം വളരുകയാൽ നന്മ നശിച്ചൂ
അരുതേവം ഗതിയിതുമാറ്റാനഗതികളെക്കാക്കുവതിന്നാ-
വരുവോനേ തുണ, മിശിഹായേ! തൊഴുതുനമിക്കാമടിയങ്ങൾ

കാവ്യഹാരം

എൻ ചിന്തകൾ കോർത്ത കാവ്യഹാരങ്ങളാ
നന്ദജൻ മേനിയിൽ ചാർത്തിയെങ്കിൽ
ചന്തവും ഗന്ധവും നന്മയും  നല്ലപോൽ
ചേർന്നവ മിന്നിനിന്നീടുമെന്നും

നിന്റെമാറത്തെന്നുമൊട്ടിനിൽക്കുന്നതാം
രത്നമായ് തീർന്നെങ്കിലെന്മാനസം
മന്നിതിൽ സ്നേഹപ്രകാശം ചൊരിഞ്ഞവ
നിന്നിടും മോദമിപ്പാരിനേകും

കൃസ്തുമസ്സ്

കരുണാമയനാം ദൈവം
കരുണാർദ്രമയച്ചതാം
തിരുപുത്രൻ പിറന്നോരാ –
തിരുനാളാഘോഷകാലമായ്