ധ്യാനം

തന്നെത്തന്നെ മറന്നു വാഴുമടവി-
യ്ക്കുള്ളില്‍ സരസ്സില്‍ സ്വയം
ചെന്നെത്തും ഗജമത്രെ കാലമവിടെ-
ക്കാത്തല്ലൊ വാഴുന്നതും
വന്നെത്തും സമയത്തു ഭക്തചരണം 
തന്നില്‍ പിടിച്ചീടുവാ-
നെന്നോണം ഹരിയെത്തുമന്നു സദയം
മോക്ഷം കൊടുത്തീടുവാന്‍

തന്നാലാവതു പോലെയൊക്കെ കഠിനാ-
ദ്ധ്വാനം തുടര്‍ന്നിട്ടവന്‍
തന്നെക്കൊണ്ടിനി സാദ്ധ്യമല്ല പൊരുതാ-
നെന്നായറിഞ്ഞീടവേ
തന്നുള്ളില്‍ തെളിയുന്ന ഭക്തികമലം
മാത്രം സമര്‍പ്പിക്കവേ
വന്നീടുന്നു കൃപാകടാക്ഷമരുളാന്‍
പൂര്‍ണ്ണത്രയീശന്‍ സ്വയം