എന്തോന്ന്?

ഇതെന്തോന്നു കുന്ത്രാണ്ടമെന്നൊന്നു ചിന്തിച്ചും
അന്തിച്ചുമന്നായ്കളെല്ലാം വിരണ്ടോ ?

പടച്ചോൻ പടച്ചുള്ളതല്ലെന്നുകണ്ടി-
ട്ടടുക്കാൻ മടിച്ചെന്നു താൻ തോന്നിടുന്നൂ

https://youtube.com/shorts/ZFR7Dc5ntx0?si=gzqQ1dnR9sRXYLXj

കണ്ടുകൂടാത്തത്

കണ്ടുകൂടാത്തതിപ്പാരിൽ
കണ്ടെന്നാൽ കണ്ണടച്ചിടാം
കാണ്മതെന്നുള്ളിലാണെന്നാൽ
കണ്ണടക്കാവതല്ല, കേൾ

Pencil and sharpner

മുനപൊട്ടിയതോർത്തൊട്ടും
മാറിനിൽക്കേണ്ട പെൻസിലേ
മൂർച്ച കൂട്ടിത്തരാം നോവാ-
മേനിതാങ്ങിടുമെങ്കിൽ ഞാൻ

Me

മാറ്റത്തിനൊത്തുമാറുമ്പോൾ
മാറ്റേറും ഞാൻ മറഞ്ഞുവോ?
മാറ്റിത്തം വന്നുപോയോ, “നോ
മാറ്റ”റെന്നായ് നിരീയ്ക്കണോ

ശീർകാഴി

ജ്ഞാനപ്പാൽ നൽകിയന്നാള-
ജ്ഞാനത്തിൻ മറ മാറ്റിയോൻ
ആനന്ദരൂപനെന്നുള്ളിൽ
സാനന്ദം കളിയാടണം

തോണിയിൽ വന്നു ലോകത്തെ
ത്രാണനം ചെയ്ത തമ്പുരാൻ
തോണിയപ്പരെയെന്നുള്ളിൽ
കാണുവാൻ തുണയീശ! നീ

വൈത്തീശ്വരൻ കോവിൽ

അംഗാരകനുതൻ സാംബൻ
ഗംഗാധരനഹർനിശം
സങ്കടം മാറ്റണം ചിത്താം
രംഗത്തിൽ കളിയാടണം

അണ്ണൻ പെരുമാൾ കോവിൽ

അണ്ണൻ പെരുമാളേ, ന-
ല്ലലർമേൽമങ്കയെത്തഥാ
അകമേ കണ്ടുകൂപ്പാൻ ത-
ന്നരുളൂ ഭക്തി മാനസേ

ശിവനാമം

നാവോതും വാക്കു നൽകൊല്ലാ
നോവാർക്കുംതന്നെയാകയാൽ
ആവതും ശിവനാമം താ-
നാവണം ഞാനുരയ്പതും

മാർക്കണ്ഡേയൻ

യമനെക്കാൺകിലോ കാണാ-
മെവനും പേടിയുള്ളതായ്
അവനോ ബാലനക്കാലം
ശിവനെക്കൂപ്പി മുക്തനായ്

സാദരം കൂപ്പിടാം

വാണിയായ്, ഗൌരിയായ്, ലക്ഷ്മിയായ്, കാളിയായ്
വാണിടും ദേവി! കൊല്ലൂരെഴും കാവിലും
കാണിനേരം മനക്കാവിലും കാൺകിലെ-
ന്താണിതിന്മീതെ, ഞാൻ കൂപ്പിടാം സാദരം