വൈക്കത്തപ്പൻ ശരണം

വൈക്കത്തപ്പൻ വിമലനജിതൻ
ശങ്കരൻ സാംബനീശൻ
മുക്കണ്ണൻ സദ്ഗുരു ശിവനജൻ
കാളകണ്ഠൻ സ്മരാരി
തൃക്കാൽക്കൽ തന്നരുൾക ശരണം
ചന്ദ്രചൂഢൻ കനിഞ്ഞെ-
ന്നുൾക്കാമ്പിൽ തെല്ലമരണമക-
റ്റീടണം ദുഃഖഭാരം

ക്ലോക്കിലെ സൂചി

ക്ലോക്കിലെ സൂചി നീങ്ങുന്നൂ
മുന്നോട്ടെന്നാളുമാകയാൽ
നല്ല കാര്യത്തിനായ് കാലം
തെല്ലും പാഴാക്കിടൊല്ല നാം

ദിലീപേട്ടൻ്റെ ശ്ലോകം

ഭൂമീദേവി

പച്ചപ്പു പൊന്നിൻ തിളക്കവും മുന്നിലീ പാടത്തുകാണുന്നതെത്ര ചിത്രം!

പാലയ്ക്കാമോതിരം ചാർത്തി ഭൂമീദേവി
ബാലയായ് നിൽക്കയാന്നെന്നുതോന്നും

വന്ദിക്ക

വീണ്ടുമപ്പോയകാലത്തിൻ്റെയോർമ്മയും
കൊണ്ടുവന്നീടുന്നു രാമപ്രസാദിതാ

വന്ദിക്ക സംഗീതപീയൂഷം തന്നതാം
വന്ദ്യരെ സാദരം തോഴരേ! സന്തതം

https://youtu.be/QgjJuweIP1o?si=-T66qN1esNOnvyIt

പോക വേദാന്തമേ നീ

ആനന്ദക്കട്ടയായും, വിബുധമുനിഗണം
തേടിടും സത്യമായും
ജ്ഞാനത്തിൻ മൂർത്തിയായും മറകളുമനിശം
കുമ്പിടും പുണ്യമായും
ഞാനെന്നും കണ്ടറിഞ്ഞോരനുപമഗുണിയാം
പൂർണ്ണവേദാലയേശൻ
സാനന്ദം വേണ്ടതെല്ലാം തരുമിവനതിനാൽ
പോക വേദാന്തമേ നീ

മനസ്സും പൊയ്കയും

തന്മുന്നിൽ കാണുമീഭൂവിൻ്റെ സൌന്ദര്യം
തന്നുള്ളിലേറ്റുവാൻ നോക്കും ജലാശയം
തന്നിലായ് കാണുന്ന ചിത്രങ്ങളൊക്കെയും
തെന്നലുള്ളിൽ തീർക്കുമോളങ്ങളാൽ ദ്രുതം
ചിന്നിച്ചിതറുന്നു,  മാനസം തന്നിലായ്
ചിന്തയോളക്കുത്തുതീർക്കുന്നവേളയിൽ
ആനന്ദം കാണാതെയായപോൽ, വിസ്മയം
താൻ!, എന്മനസ്സുമിപ്പൊയ്കയുമൊന്നുപോൽ

എത്ര നന്നായിരുന്നു!

പുഴയൊഴുകിവരുംപോൽ തെന്നലെത്തുന്നപോലെ
മഴപൊഴിവതുപോലെ പൂനിലാവെന്നപോലെ
പഴയലളിതഗാനം പോലെ വാക്കെന്നുമേ ന –
ല്ലഴകൊടു വരുമെന്നാലെത്ര നന്നായിരുന്നൂ