തൃപ്പൂണിത്തുറയിൽ മെട്രോ വരുമ്പോൾ

*തൃപ്പൂണിത്തുറയിൽ മെട്രോ വരുമ്പോൾ*

തീവണ്ടിത്തമ്പുരാനപ്പൊഴുതുജനഹിതം
കണ്ടറിഞ്ഞേകിയത്രേ
തീവണ്ടിക്കെത്തുവാനായ് ചിലവിനു നിഗമേശൻ്റെ പൊന്നേറെ, ചിത്രം!
ദേവൻ തൻ പൂജയായിക്കരുതി ജനതതൻ –
സേവ രാജർഷിയന്നാ –
ളേവം വന്നെത്തികൊച്ചിക്കനുപമനില പിൽ-
ക്കാലമെന്നല്ലി കാണ്മൂ

ഇക്കാലത്തിന്നുചേരുംപടി വികസനവും
.കൊണ്ടുമെട്രോ വരുമ്പോ-
ളോർക്കാമാമന്നനേയും സവിനയ, മവന –
ന്നാളുചെയ്തോരു പുണ്യം
എക്കാലത്തും യശസ്സിൻ കൊടുമുടി മുകളിൽ
കൊച്ചിയെൻ ജന്മഭൂവും
നിൽക്കാൻ നന്നായൊരുക്കീവഴി, യിതുവഴിയായ്
നാടു പുഷ്ടിപ്പെടട്ടേ

കൃപയ്ക്കു കാക്കുന്നു

ശിവപ്രിയേ! ശങ്കരി! ഗൌരി, യംബികേ!
തപസ്വിനീ! പാർവ്വതി! ലോകനായികേ
വിപത്തകറ്റിത്തുണയേക, നിൻ മഹാ –
കൃപയ്ക്കു കാക്കുന്നു ശിവേ! മഹേശ്വരീ

കഠിനം

കവിത രസിക്കാതമരുകയാണോ?
കഠിനമതെന്നേ കരുതുക നല്ലൂ
കഴിവതിനേറ്റം വരുവതിനായി
കൊതിവളരട്ടെ നരനകതാരിൽ

മാധവം

ചൊടികളിലെത്തേൻ നുകരുവതായാൽ
ഉടനടി പാടും ചെറിയൊരുപുല്ലും
കടമിഴിയമ്പാലടിപതറിപ്പോയ്
പിടയുമൊരായർതരുണിമനസ്സും

ശരണം

മുരഹര! സാക്ഷാൽ നിഗമപുരീശാ, ഭഗവാനേ
ഹര മമ ദുഃഖം,  മമ ഹൃദി വാഴൂ ഭയമാറ്റാൻ
വരദ! കൃപാലോ! പാർത്ഥസഖേ! കാത്തരുളേണം
തരണമെനിക്കാചരണയുഗത്തിൽ ശരണം നീ