കതിരവാ!

ചൂടാകാതെയിരിക്കണം കതിരവാ!
ഭൂവിൻ്റെ കാര്യം നിന-
ച്ചേടാകൂടമൊരുക്കിടൊല്ല, ധരയെ –
ത്തെല്ലും വലച്ചീടൊലാ
പാടാണിങ്ങു വസിക്കുവാൻ ഖലരഹോ
കൂടുന്നു, കൂടെബ്‌ഭവാൻ
കൂടാതിത്തിരി ദാഹനീരു കടമായ്
മേഘത്തിനേകീടണം

കാറ്റോടോതുക, നീർനിറഞ്ഞ മുകിലിൻ
കൂട്ടത്തെയും കൂട്ടുവാൻ,
ചുറ്റും ചുറ്റിനടന്നിടാതെ മഴയെൻ
നാടിന്നുനൽകീടുവാൻ,
തെറ്റെന്നിപ്പണി ചെയ്യുവാൻ പറയണം,
ചൂടീവിധം കൂട്ടിയാൽ
ചുറ്റിപ്പോയിടുമേവരും, സകരുണം
നീ മാരി പെയ്യിക്കണം