ദുഃഖവെള്ളി

നിർമ്മമൻ നിസ്സംഗനീശ്വരനെങ്കിലും
നമ്മൾ നന്നായിങ്ങു ജീവിക്കുവാൻ
നിർമ്മലസ്നേഹത്തിൻ സന്ദേശവും കൊണ്ടു
തന്മകനെത്തന്നെ വിട്ടയച്ചൂ!

നമ്മളെന്നാൽ തിരിച്ചീശ്വരപുത്രനായ്
വന്മരത്തിൽ കുരിശ്ശേകി, കഷ്ടം!

അക്കുരിശ്ശിന്മേൽ കിടന്നുനീറുമ്പൊഴു –
മുൾക്കാമ്പിൽ നീരസം തോന്നിയില്ല
ഇജ്ജനം ചെയ്യുന്ന കർമ്മത്തിൻ കാരണം
അജ്ഞാനം തന്നെയെന്നോർത്തു ധീമാൻ
എല്ലാം പൊറുക്കുകെന്നോതിയീലോകർക്കായ്
വല്ലാത്ത നോവും സഹിച്ചുനിന്നൂ